Agurainen euskaraz BERBALAGUNen bitartez

2010ko martxoak 17

Gaur, martxoak 17, goizeko 11etan AEk-ren Berbalagun egitasmoa aurkeztu dute Aguraingo udaletxean. Bertan Peio Iparragirrek (Euskara zinegotzia), Ainitze Sz. de Arregik (Lautadako AEK-ko zuzendaria), Yolanda Arrondok (Berbalagun egitasmoaren dinamizatzailea) eta Joseba Legardak (Eskualdeko Euskara Teknikaria) hartu dute parte.

Agurainen euskaraz bizitzea ez da erraza eta ezagutzaren arloan aurrerapauso izugarriak eman diren arren, hori ez da erabileran maila berean islatzen. Klasetik edo euskaltegietatik kanpoko eremu gehienetan erdara da nagusi, eta ondorioz erabilera hori ez da berez ematen, eta planifikazio minimo bat behar izaten du askotan. Berbalagun egitasmoa horretara dator, euskaldunok eta euskara ikasten ari garenok euskaraz hitz egiteko aukera gehiago izan dezagun, aurten Agurainen euskararen eragileok inoiz baino indartsuago den berbalagun programa martxan daukagu.

Aguraingo udala, Lautadako AEK eta Olbea euskara elkartea dira egitasmo honen sustatzaileak. Partaide guztion helburua Aguraingo gainontzeko talde, elkarte eta gizabanakoekin elkarlanean hastea da, euskararen normalkuntza prozesuan denon ahalegina eta ekarpenak beharrezkoak baitira.

Berbalagunen helburuak bi dira: Aguraingo euskaldunok elkar ezagutzea eta bestetik ikasten ari diren ikasle zein edozein aguraindarrek praktikatzeko aukera gehiago izatea.

• Berbataldeak: taldeen edota bikoteen topaketak dira. Adina, zaletasunak, eta disponibilitatea kontuan hartuta lauzpabost laguneko taldeak osatuko dira. Astean behin ordubetez euskaraz hitz egiteko konpromisoa hartuta, denon artean erabakiko dute noiz, non eta zertarako bildu. Arruntena astean behin taberna batean biltzea da, baina aukera asko daude: kontzertuetara joan, antzezlanak ikusi, ikastaroak egin eta jakina, mendizaleen taldea ere ez da faltako.
• Ekintza osagarriak: Hilabetean behin berbalagun guztiak bilduko dituen jarduera bat burutuko dugu (mendi irteera, tailerra, hitzaldiak,...) Jarduera hauetan edonork hartu ahal izango du parte.

Matrikulazio kanpaina zabalik dago eta berbataldeak Aste Santua pasa ondoren hasiko dira biltzen.

Berbalagun egitasmoan parte hartuko dutenek EHUn kredituak lor ditzakete, UEUn matrikula prezio erdian, BERRIAren asteburuko harpidetzan %50eko deskontua eta AIZU aldizkaria merkeago.

Hemendik aurrera Aguraingo euskaldunon sarea indartuz joango da, euskara ikasten ari direnek hitz egiteko aukera gehiago izango dute eta euskara kalera aterako dugu. Badakigu lan handia dagoela oraindik egiteko, baina gogotsu ari gara euskararen alde.

Egitasmoan izena emateko: Aguraingo AEK euskaltegian eta Aguraingo Udalean.
Harremanetarako: lautada@aek.org
Telefonoa: 945-300408